تمام ممالک اور زبانیں
ملک کے مطابق حساب کا طریقہ، عصر کا مسلک اور ہجری تاریخ طے ہوتی ہے۔
واقعہ ہونے والی قیامت · 96 آیات · مکی · پارہ 27 · صفحہ 534
سورۃ الواقعة قرآن مجید کی 56ویں سورۃ ہے، اس میں 96 آیات ہیں اور یہ مکی ہے۔ یہ سورۃ پارہ 27 میں، مصحفِ مدینہ کے صفحہ 534 سے شروع ہوتی ہے۔ اس کے نام کا مطلب “واقعہ ہونے والی قیامت” ہے اور ترتیبِ نزول میں اس کا نمبر 46 ہے۔ عربی متن تنزیل کے عثمانی رسم الخط کے مطابق اور ترجمہ ترجمہ: محمد جوناگڑھی (QuranEnc v1.1.3) ہے۔
قرآن کے کسی صفحے پر اشتہار نہیں۔
بِسْمِ ٱللَّهِ ٱلرَّحْمَٰنِ ٱلرَّحِيمِ
إِذَا وَقَعَتِ ٱلْوَاقِعَةُ
جب قیامت قائم ہو جائے گی.[1]
[1] واقعہ بھی قیامت کے ناموں میں سے ہے، کیونکہ یہ لامحالہ واقع ہونے والی ہے،اس لیے اس کا یہ نام بھی ہے۔
سورۃ Al-Waqi'ah [56]: 1 · ترجمہ: محمد جوناگڑھی (QuranEnc v1.1.3)
لَيْسَ لِوَقْعَتِهَا كَاذِبَةٌ
جس کے واقع ہونے میں کوئی جھوٹ نہیں.
سورۃ Al-Waqi'ah [56]: 2 · ترجمہ: محمد جوناگڑھی (QuranEnc v1.1.3)
خَافِضَةٌ رَّافِعَةٌ
وه پست کرنے والی اور بلند کرنے والی ہوگی.[1]
[1] پستی اور بلندی سے مطلب ذلت اور عزت ہے۔ یعنی اللہ کے اطاعت گزار بندوں کو یہ بلند اور نافرمانوں کو پست کرے گی، چاہےدنیا میں معاملہ اس کے برعکس ہو۔ اہل ایمان وہاں معزز و مکرم ہوں گےاور اہل کفر و عصیان ذلیل و خوار۔
سورۃ Al-Waqi'ah [56]: 3 · ترجمہ: محمد جوناگڑھی (QuranEnc v1.1.3)
إِذَا رُجَّتِ ٱلْأَرْضُ رَجًّا
جبکہ زمین زلزلہ کے ساتھ ہلا دی جائے گی.
سورۃ Al-Waqi'ah [56]: 4 · ترجمہ: محمد جوناگڑھی (QuranEnc v1.1.3)
وَبُسَّتِ ٱلْجِبَالُ بَسًّا
اور پہاڑ بالکل ریزه ریزه کر دیے جائیں گے.[1]
[1] رَجًّا کے معنی حرکت واضطراب (زلزلہ) اور بس کے معنی ریزہ ریزہ ہو جانے کے ہیں۔
سورۃ Al-Waqi'ah [56]: 5 · ترجمہ: محمد جوناگڑھی (QuranEnc v1.1.3)
فَكَانَتْ هَبَآءً مُّنۢبَثًّا
پھر وه مثل پراگنده غبار کے ہو جائیں گے.
سورۃ Al-Waqi'ah [56]: 6 · ترجمہ: محمد جوناگڑھی (QuranEnc v1.1.3)
وَكُنتُمْ أَزْوَٰجًا ثَلَٰثَةً
اور تم تین جماعتوں میں ہو جاؤ گے.[1]
[1] أَزْوَاجًا: أَصْنَافًا کے معنی میں ہے۔
سورۃ Al-Waqi'ah [56]: 7 · ترجمہ: محمد جوناگڑھی (QuranEnc v1.1.3)
فَأَصْحَٰبُ ٱلْمَيْمَنَةِ مَآ أَصْحَٰبُ ٱلْمَيْمَنَةِ
پس داہنے ہاتھ والے کیسے اچھے ہیں داہنے ہاتھ والے.[1]
[1] اس سے عام مومنین مراد ہیں جن کو ان کے اعمال نامے دائیں ہاتھوں میں دیئے جائیں گے جو ان کی خوش بختی کی علامت ہوگی۔
سورۃ Al-Waqi'ah [56]: 8 · ترجمہ: محمد جوناگڑھی (QuranEnc v1.1.3)
وَأَصْحَٰبُ ٱلْمَشْـَٔمَةِ مَآ أَصْحَٰبُ ٱلْمَشْـَٔمَةِ
اور بائیں ہاتھ والے کیا حال ہے بائیں ہاتھ والوں کا.[1]
[1] اس سے مراد کافر ہیں جن کو ان کے اعمال نامے بائیں ہاتھوں میں پکڑائے جائیں گے۔
سورۃ Al-Waqi'ah [56]: 9 · ترجمہ: محمد جوناگڑھی (QuranEnc v1.1.3)
وَٱلسَّٰبِقُونَ ٱلسَّٰبِقُونَ
اور جو آگے والے ہیں وه تو آگے والے ہی ہیں.[1]
[1] ان سےمراد خواص مومنین ہیں، یہ تیسری قسم ہے جوایمان قبول کرنے میں سبقت کرنے اور نیکی کے کاموں میں بڑھ چڑھ کرحصہ لینے والے ہیں، اللہ تعالیٰ ان کو قرب خاص سےنوازے گا، یہ ترکیب ایسے ہی ہے، جیسے کہتے ہیں، تو تو ہے اور زید زید، اس میں گویا زید کی اہمیت اور فضیلت کا بیان ہے۔
سورۃ Al-Waqi'ah [56]: 10 · ترجمہ: محمد جوناگڑھی (QuranEnc v1.1.3)
أُو۟لَٰٓئِكَ ٱلْمُقَرَّبُونَ
وه بالکل نزدیکی حاصل کیے ہوئے ہیں.
سورۃ Al-Waqi'ah [56]: 11 · ترجمہ: محمد جوناگڑھی (QuranEnc v1.1.3)
فِى جَنَّٰتِ ٱلنَّعِيمِ
نعمتوں والی جنتوں میں ہیں.
سورۃ Al-Waqi'ah [56]: 12 · ترجمہ: محمد جوناگڑھی (QuranEnc v1.1.3)
ثُلَّةٌ مِّنَ ٱلْأَوَّلِينَ
(بہت بڑا) گروه تو اگلے لوگوں میں سے ہوگا.
سورۃ Al-Waqi'ah [56]: 13 · ترجمہ: محمد جوناگڑھی (QuranEnc v1.1.3)
وَقَلِيلٌ مِّنَ ٱلْـَٔاخِرِينَ
اور تھوڑے سے پچھلے لوگوں میں سے.[1]
[1] ثُلَّةٌ، اس بڑے گروہ کو کہا جاتا ہے جس کا گننا ناممکن ہو۔ کہا جاتا ہے کہ اولین سےمراد حضرت آدم (عليه السلام) سے لے کر نبی ﹲ تک کی امت کےلوگ ہیں اور آخرین سے امت محمدیہ کے افراد۔ مطلب یہ ہے کہ پچھلی امتوں میں سابقین کا ایک بڑا گروہ ہے، کیونکہ ان کا زمانہ بہت لمبا ہے جس میں ہزاروں انبیا کے سابقین شامل ہیں ان کے مقابلے میں امت محمدیہ کا زمانہ (قیامت تک) تھوڑا ہے، اس لیے ان میں سابقین بھی بہ نسبت گزشتہ امتوں کے تھوڑے ہوں گے۔ اور ایک حدیث میں آتا ہے۔ جس میں نبی ﹲ نے فرمایا ہے کہ مجھے امید ہے کہ تم جنتیوں کا نصف ہو گے (صحیح مسلم، نمبر 200) تو یہ آیت کے مذکورہ مفہوم کےمخالف نہیں۔ کیونکہ امت محمدیہ کہ سابقین اور عام مومنین ملا کر باقی تمام امتوں سے جنت میں جانے والوں کا نصف ہو جائیں گے، اس لیے محض سابقین کی کثرت (سابقہ امتوں میں) سے حدیث میں بیان کردہ تعداد کی نفی نہیں ہو گی۔ مگریہ قول محل نظر ہے اور بعض نے اولین وآخرین سے اسی امت محمدیہ کے افراد مراد لیے ہیں۔ یعنی اس کے پہلے لوگوں میں سابقین کی تعداد زیادہ اور پچھلے لوگوں میں تھوڑی ہوگی۔ امام ابن کثیر نے اسی دوسرے قول کو ترجیح دی ہے۔ اوریہی زیادہ درست معلوم ہوتا ہے یہ جملہ معترضہ ہے، فِي جَنَّاتِ النَّعِيمِ اور عَلَى سُرُرٍ مَوْضُونَةٍ کے درمیان۔
سورۃ Al-Waqi'ah [56]: 14 · ترجمہ: محمد جوناگڑھی (QuranEnc v1.1.3)
عَلَىٰ سُرُرٍ مَّوْضُونَةٍ
یہ لوگ سونے کے تاروں سے بنے ہوئے تختوں پر.
سورۃ Al-Waqi'ah [56]: 15 · ترجمہ: محمد جوناگڑھی (QuranEnc v1.1.3)
مُّتَّكِـِٔينَ عَلَيْهَا مُتَقَٰبِلِينَ
ایک دوسرے کےسامنے تکیہ لگائے بیٹھے ہوں گے.[1]
[1] مَوْضُونَةٌ بنے ہوئے جڑےہوئے۔ یعنی مذکورہ جنتی سونے کے تاروں سے بنے اور سونے جواہر سے جڑے ہوئے تختوں پر ایک دوسرے کے سامنے تکیوں پر بیٹھے ہوں گے یعنی رو در رو ہوں گے نہ کہ پشت بہ پشت۔
سورۃ Al-Waqi'ah [56]: 16 · ترجمہ: محمد جوناگڑھی (QuranEnc v1.1.3)
يَطُوفُ عَلَيْهِمْ وِلْدَٰنٌ مُّخَلَّدُونَ
ان کے پاس ایسے لڑکے جو ہمیشہ (لڑکے ہی[1] ) رہیں گے آمدورفت کریں گے.
[1] یعنی وہ بڑے نہیں ہوں گے کہ بوڑھے ہو جائیں نہ ان کے خدوخال اور قدوقامت میں کوئی تغیر واقع ہوگا،بلکہ ایک ہی عمر اور ایک ہی حالت پر رہیں گے، جیسےنوعمر لڑکےہوتے ہیں۔
سورۃ Al-Waqi'ah [56]: 17 · ترجمہ: محمد جوناگڑھی (QuranEnc v1.1.3)
بِأَكْوَابٍ وَأَبَارِيقَ وَكَأْسٍ مِّن مَّعِينٍ
آبخورے اور جگ لے کر اور ایسا جام لے کر جو بہتی ہوئی شراب سے پر ہو.
سورۃ Al-Waqi'ah [56]: 18 · ترجمہ: محمد جوناگڑھی (QuranEnc v1.1.3)
لَّا يُصَدَّعُونَ عَنْهَا وَلَا يُنزِفُونَ
جس سے نہ سر میں درد ہو نہ عقل میں فتور آئے.[1]
[1] صُدَاعٌ، ایسے سر درد کو کہتے ہیں جو شراب کےنشے اور خمار کی وجہ سے ہو اور إِنْزَافٌ کے معنی، وہ فتور عقل جو مدہوشی کی بنیاد پر ہو۔ دنیا کی شراب کے نتیجے میں یہ دونوں چیزیں ہوتی ہیں، آخرت کی شراب میں سرور اور لذت تو یقیناً ہو گی لیکن یہ خرابیاں نہیں ہوں گی۔ معین، چشمہ جاری جو خشک نہ ہو۔
سورۃ Al-Waqi'ah [56]: 19 · ترجمہ: محمد جوناگڑھی (QuranEnc v1.1.3)
وَفَٰكِهَةٍ مِّمَّا يَتَخَيَّرُونَ
اور ایسے میوے لیے ہوئے جو ان کی پسند کے ہوں.
سورۃ Al-Waqi'ah [56]: 20 · ترجمہ: محمد جوناگڑھی (QuranEnc v1.1.3)
وَلَحْمِ طَيْرٍ مِّمَّا يَشْتَهُونَ
اور پرندوں کے گوشت جو انہیں مرغوب ہوں.
سورۃ Al-Waqi'ah [56]: 21 · ترجمہ: محمد جوناگڑھی (QuranEnc v1.1.3)
وَحُورٌ عِينٌ
اور بڑی بڑی آنکھوں والی حوریں.
سورۃ Al-Waqi'ah [56]: 22 · ترجمہ: محمد جوناگڑھی (QuranEnc v1.1.3)
كَأَمْثَٰلِ ٱللُّؤْلُؤِ ٱلْمَكْنُونِ
جو چھپے ہوئے موتیوں کی طرح ہیں.[1]
[1] مَكْنُونٌ، جسے چھپا کر رکھا گیا، اس کو کسی کے ہاتھ لگے ہوں نہ گردوغبار اسے پہنچا ہو۔ ایسی چیز بالکل صاف ستھری اور اصلی حالت میں رہتی ہے۔
سورۃ Al-Waqi'ah [56]: 23 · ترجمہ: محمد جوناگڑھی (QuranEnc v1.1.3)
جَزَآءًۢ بِمَا كَانُوا۟ يَعْمَلُونَ
یہ صلہ ہے ان کے اعمال کا.
سورۃ Al-Waqi'ah [56]: 24 · ترجمہ: محمد جوناگڑھی (QuranEnc v1.1.3)
لَا يَسْمَعُونَ فِيهَا لَغْوًا وَلَا تَأْثِيمًا
نہ وہاں بکواس سنیں گے اور نہ گناه کی بات.
سورۃ Al-Waqi'ah [56]: 25 · ترجمہ: محمد جوناگڑھی (QuranEnc v1.1.3)
إِلَّا قِيلًا سَلَٰمًا سَلَٰمًا
صرف سلام ہی سلام کی آواز ہوگی.[1]
[1] یعنی دنیامیں تو باہم لڑائی جھگڑے ہی ہوتے ہیں، حتیٰ کہ بہن بھائی بھی اس سے محفوظ نہیں، اس اختلاف و نزاع سے دلوں میں کدورتیں اور بغض و عنادپیدا ہوتا ہے جو ایک دوسرےکے خلاف بدزبانی، سب وشتم، غیبت اور چغل خوری وغیرہ پر انسان کو آمادہ کرتا ہے۔ جنت ان تمام اخلاقی گندگیوں اور بےہودگیوں سے نہ صرف پاک ہوگی، بلکہ وہاں سلام ہی سلام کی آوازیں سننے میں آئیں گی، فرشتوں کی طرف سے بھی اور آپس میں اہل جنت کی طرف سے بھی۔ جس کا مطلب ہے کہ وہاں سلام و تحیہ توہو گا۔ لیکن دل اور زبان کی وہ خرابیاں نہیں ہوں گی جو دنیامیں عام ہیں حتیٰ کہ بڑے بڑے دین دار بھی ان سے محفوظ نہیں۔
سورۃ Al-Waqi'ah [56]: 26 · ترجمہ: محمد جوناگڑھی (QuranEnc v1.1.3)
وَأَصْحَٰبُ ٱلْيَمِينِ مَآ أَصْحَٰبُ ٱلْيَمِينِ
اور داہنے ہاتھ والے کیا ہی اچھے ہیں داہنے ہاتھ والے.[1]
[1] اب تک سابقین (مُقَرَّبِينَ) کا ذکر تھا، أَصْحَابُ الْيَمِينِ سے اب عام مومنین کا ذکر ہورہا ہے۔
سورۃ Al-Waqi'ah [56]: 27 · ترجمہ: محمد جوناگڑھی (QuranEnc v1.1.3)
فِى سِدْرٍ مَّخْضُودٍ
وه بغیرکانٹوں کی بیریوں.
سورۃ Al-Waqi'ah [56]: 28 · ترجمہ: محمد جوناگڑھی (QuranEnc v1.1.3)
وَطَلْحٍ مَّنضُودٍ
اور تہ بہ تہ کیلوں.
سورۃ Al-Waqi'ah [56]: 29 · ترجمہ: محمد جوناگڑھی (QuranEnc v1.1.3)
وَظِلٍّ مَّمْدُودٍ
اور لمبے لمبے سایوں.[1]
[1] جیسے ایک حدیث میں ہے کہ (جنت کے ایک درخت کے سائے تلے ایک گھوڑ سوار سو سال تک چلتا رہے گا، تب بھی، وہ سایہ ختم نہیں ہوگا)۔ (صحيح بخاري، تفسير سورة الواقعة ، مسلم ، كتاب الجنة ، باب إن في الجنة شجرة....)۔
سورۃ Al-Waqi'ah [56]: 30 · ترجمہ: محمد جوناگڑھی (QuranEnc v1.1.3)
وَمَآءٍ مَّسْكُوبٍ
اور بہتے ہوئے پانیوں.
سورۃ Al-Waqi'ah [56]: 31 · ترجمہ: محمد جوناگڑھی (QuranEnc v1.1.3)
وَفَٰكِهَةٍ كَثِيرَةٍ
اور بکثرت پھلوں میں.
سورۃ Al-Waqi'ah [56]: 32 · ترجمہ: محمد جوناگڑھی (QuranEnc v1.1.3)
لَّا مَقْطُوعَةٍ وَلَا مَمْنُوعَةٍ
جو نہ ختم ہوں نہ روک لیے جائیں.[1]
[1] یعنی یہ پھل موسمی نہیں ہوں گے کہ موسم گزر گیا تو یہ پھل بھی آئندہ فصل تک ناپید ہو جائیں، یہ پھل اس طرح فصل گل ولالہ کے پابند نہیں ہوں گے، بلکہ بہار و خزاں اور گرمی و سردی ہر موسم میں دستیاب ہوں گے۔ اس طرح ان کے حصول میں کوئی رکاوٹ نہیں ہوگی۔
سورۃ Al-Waqi'ah [56]: 33 · ترجمہ: محمد جوناگڑھی (QuranEnc v1.1.3)
وَفُرُشٍ مَّرْفُوعَةٍ
اور اونچے اونچے فرشوں میں ہوں گے.[1]
[1] بعض نے فرشوں سے بیویوں اور مرفوعہ سےبلند مرتبہ کا مفہوم مراد لیاہے۔
سورۃ Al-Waqi'ah [56]: 34 · ترجمہ: محمد جوناگڑھی (QuranEnc v1.1.3)
إِنَّآ أَنشَأْنَٰهُنَّ إِنشَآءً
ہم نے ان کی (بیویوں کو) خاص طور پر بنایا ہے.
سورۃ Al-Waqi'ah [56]: 35 · ترجمہ: محمد جوناگڑھی (QuranEnc v1.1.3)
فَجَعَلْنَٰهُنَّ أَبْكَارًا
اور ہم نے انہیں کنواریاں بنا دیا ہے.[1]
[1] أَنْشَأْنَاهُنَّ کا مرجع اگرچہ قریب میں نہیں ہے لیکن سیاق کلام اس پر دلالت کرتا ہے کہ اس سے مراد اہل جنت کو ملنے والی بیویاں اور حور عین ہیں۔ حوریں، ولادت کے عام طریقے سے پیدا شدہ نہیں ہوں گی، بلکہ اللہ تعالیٰ خاص طور پر انہیں جنت میں اپنی قدرت خاص سے بنائے گا، اور جو دنیاوی عورتیں ہوں گی، تو و ہ بھی حوروں کے علاوہ اہل جنت کو بیویوں کے طور پر ملیں گی، ان میں بوڑھی، کالی، بدشکل، جس طرح کی بھی ہوں گی، سب کو اللہ تعالی ﺀ جنت میں جوانی اور حسن وجمال سے نواز دے گا، نہ کوئی بوڑھی،بوڑھی رہے گی، نہ کوئی بدشکل، بدشکل بلکہ سب باکرہ (کنواری) کی حیثیت میں ہوں گی۔
سورۃ Al-Waqi'ah [56]: 36 · ترجمہ: محمد جوناگڑھی (QuranEnc v1.1.3)
عُرُبًا أَتْرَابًا
محبت والیاں اور ہم عمر ہیں.[1]
[1] عُرُبٌ عَرُوبَةٌ کی جمع ہے۔ ایسی عورت جو اپنے حسن وجمال اور دیگر محاسن کی وجہ سے خاوند کو نہایت محبوب ہو۔ أَتْرَابٌ تِرْبٌ کی جمع ہے۔ ہم عمر، یعنی سب عورتیں جو اہل جنت کو ملیں گی، ایک ہی عمر کی ہوں گی، جیساکہ حدیث میں بیان کیا گیا ہے کہ سب جنتی 33 سال کی عمر کےہوں گے، (سنن ترمذي، باب ما جاء في سن أهل الجنة) یا مطلب ہےکہ خاوندوں کی ہم عمر ہوں گی۔ مطلب دونوں صورتوں میں ایک ہی ہے۔
سورۃ Al-Waqi'ah [56]: 37 · ترجمہ: محمد جوناگڑھی (QuranEnc v1.1.3)
لِّأَصْحَٰبِ ٱلْيَمِينِ
دائیں ہاتھ والوں کے لیے ہیں.
سورۃ Al-Waqi'ah [56]: 38 · ترجمہ: محمد جوناگڑھی (QuranEnc v1.1.3)
ثُلَّةٌ مِّنَ ٱلْأَوَّلِينَ
جم غفیر ہے اگلوں میں سے.[1]
[1] یعنی آدم (عليه السلام) سے لے کر نبی کریم ﹲ تک کےلوگوں میں سے یا خود امت محمدیہ کے اگلوں میں سے۔
سورۃ Al-Waqi'ah [56]: 39 · ترجمہ: محمد جوناگڑھی (QuranEnc v1.1.3)
وَثُلَّةٌ مِّنَ ٱلْـَٔاخِرِينَ
اور بہت بڑی جماعت ہے پچھلوں میں سے.[1]
[1] یعنی نبی صلی اللہ علیہ وسلم کی امت میں سے یا آپ کی امت کے پچھلوں میں سے۔
سورۃ Al-Waqi'ah [56]: 40 · ترجمہ: محمد جوناگڑھی (QuranEnc v1.1.3)
وَأَصْحَٰبُ ٱلشِّمَالِ مَآ أَصْحَٰبُ ٱلشِّمَالِ
اور بائیں ہاتھ والے کیا ہیں بائیں ہاتھ والے[1]
[1] اس سے مراد اہل جہنم ہیں، جن کو ان کے اعمال نامے بائیں ہاتھ میں پکڑائے جائیں گے، جو ان کی مقدر شدہ شقاوت کی علامت ہو گی۔
سورۃ Al-Waqi'ah [56]: 41 · ترجمہ: محمد جوناگڑھی (QuranEnc v1.1.3)
فِى سَمُومٍ وَحَمِيمٍ
گرم ہوا اور گرم پانی میں (ہوں گے).
سورۃ Al-Waqi'ah [56]: 42 · ترجمہ: محمد جوناگڑھی (QuranEnc v1.1.3)
وَظِلٍّ مِّن يَحْمُومٍ
اورسیاه دھوئیں کے سائے میں.[1]
[1] سَمُومٍ، آگ کی حرارت یاگرم ہوا جو مسام بدن میں گھس جائے۔ حَمِيمٍ، کھولتا ہوا پانی، يَحْمُومٍ، حِمَمَةٌ سے ہے، بمعنی سیاہ، اور احم بہت زیادہ سیاہ چیز ہو تو کہا جاتا ہے، يَحْمُومٍ کے معنی سخت کالا دھواں مطلب یہ ہے کہ جہنم کے عذاب سے تنگ آ کر وہ ایک سائے کی طرف دوڑیں گے، لیکن جب وہاں پہنچیں گے تو معلوم ہوگا کہ یہ سایہ نہیں ہے، جہنم ہی کی آگ کا سخت سیاہ دھواں ہے۔ بعض کہتےہیں کہ یہ حَمٌّ سے ہے جو اس چربی کو کہتے ہیں جوآ گ میں جل جل کر سیاہ ہو گئی ہو۔ بعض کہتے ہیں، یہ حِمَمٌ سے ہے، جو کوئلے کےمعنی میں ہے۔ اسی لیے امام ضحاک فرماتے ہیں۔ آگ بھی سیاہ ہے، اہل نار بھی سیاہ رو ہوں گے۔ اور جہنم میں جو کچھ بھی ہوگا۔ ، سیاہ ہی ہو گا۔ اللَّهُمَّ أَجِرْنَا مِنَ النَّارِ۔
سورۃ Al-Waqi'ah [56]: 43 · ترجمہ: محمد جوناگڑھی (QuranEnc v1.1.3)
لَّا بَارِدٍ وَلَا كَرِيمٍ
جو نہ ٹھنڈا ہے نہ فرحت بخش.[1]
[1] یعنی سایہ ٹھنڈا ہوتا ہے، لیکن یہ جس کو سایہ سمجھ رہےہوں گے، وہ سایہ ہی نہیں ہوگا، جوٹھنڈا ہو، وہ تو جہنم کا دھواں ہوگا، وَلا كَرِيمٍ ،جس میں کوئی حسن منظر یا خیر نہیں۔ یا حلاوت نہیں۔
سورۃ Al-Waqi'ah [56]: 44 · ترجمہ: محمد جوناگڑھی (QuranEnc v1.1.3)
إِنَّهُمْ كَانُوا۟ قَبْلَ ذَٰلِكَ مُتْرَفِينَ
بیشک یہ لوگ اس سے پہلے بہت نازوں میں پلے ہوئے تھے.[1]
[1] یعنی دنیا میں آخرت سے غافل ہو کر عیش و عشرت کی زندگی میں ڈوبے ہوئے تھے۔
سورۃ Al-Waqi'ah [56]: 45 · ترجمہ: محمد جوناگڑھی (QuranEnc v1.1.3)
وَكَانُوا۟ يُصِرُّونَ عَلَى ٱلْحِنثِ ٱلْعَظِيمِ
اور بڑے بڑے گناہوں پر اصرار کرتے تھے.
سورۃ Al-Waqi'ah [56]: 46 · ترجمہ: محمد جوناگڑھی (QuranEnc v1.1.3)
وَكَانُوا۟ يَقُولُونَ أَئِذَا مِتْنَا وَكُنَّا تُرَابًا وَعِظَٰمًا أَءِنَّا لَمَبْعُوثُونَ
اور کہتے تھے کہ کیا جب ہم مر جائیں گے اور مٹی اور ہڈی ہو جائیں گے تو کیا ہم پھر دوباره اٹھا کھڑے کیے جائیں گے.
سورۃ Al-Waqi'ah [56]: 47 · ترجمہ: محمد جوناگڑھی (QuranEnc v1.1.3)
أَوَءَابَآؤُنَا ٱلْأَوَّلُونَ
اور کیا ہمارے اگلے باپ دادا بھی؟[1]
[1] اس سے معلوم ہوا کہ عقیدۂ آخرت کا انکار ہی کفر وشرک اور معاصی میں ڈوبے رہنےکا بنیادی سبب ہے . یہی وجہ ہے کہ جب آخرت کاتصور، اس کے ماننے والوں کے ذہنوں میں دھندلا جاتا ہے، تو ان میں بھی فسق و فجور عام ہو جاتا ہے۔ جیسے آج کل عام مسلمانوں کاحال ہے۔
سورۃ Al-Waqi'ah [56]: 48 · ترجمہ: محمد جوناگڑھی (QuranEnc v1.1.3)
قُلْ إِنَّ ٱلْأَوَّلِينَ وَٱلْـَٔاخِرِينَ
آپ کہہ دیجئے کہ یقیناً سب اگلے اور پچھلے.
سورۃ Al-Waqi'ah [56]: 49 · ترجمہ: محمد جوناگڑھی (QuranEnc v1.1.3)
لَمَجْمُوعُونَ إِلَىٰ مِيقَٰتِ يَوْمٍ مَّعْلُومٍ
ضرور جمع کئے جائیں گے ایک مقرر دن کے وقت.
سورۃ Al-Waqi'ah [56]: 50 · ترجمہ: محمد جوناگڑھی (QuranEnc v1.1.3)
ثُمَّ إِنَّكُمْ أَيُّهَا ٱلضَّآلُّونَ ٱلْمُكَذِّبُونَ
پھر تم اے گمراہو جھٹلانے والو!
سورۃ Al-Waqi'ah [56]: 51 · ترجمہ: محمد جوناگڑھی (QuranEnc v1.1.3)
لَـَٔاكِلُونَ مِن شَجَرٍ مِّن زَقُّومٍ
البتہ کھانے والے ہو تھوہر کا درخت.
سورۃ Al-Waqi'ah [56]: 52 · ترجمہ: محمد جوناگڑھی (QuranEnc v1.1.3)
فَمَالِـُٔونَ مِنْهَا ٱلْبُطُونَ
اور اسی سے پیٹ بھرنے والے ہو.[1]
[1] یعنی اس کریہ المنظر اور نہایت بدذائقہ اور تلخ درخت کا کھانا تمہیں اگرچہ سخت ناگوار ہوگا، لیکن بھوک کی شدت سےتمہیں اسی سے اپنا پیٹ بھرنا ہوگا۔
سورۃ Al-Waqi'ah [56]: 53 · ترجمہ: محمد جوناگڑھی (QuranEnc v1.1.3)
فَشَٰرِبُونَ عَلَيْهِ مِنَ ٱلْحَمِيمِ
پھر اس پر گرم کھولتا پانی پینے والے ہو.
سورۃ Al-Waqi'ah [56]: 54 · ترجمہ: محمد جوناگڑھی (QuranEnc v1.1.3)
فَشَٰرِبُونَ شُرْبَ ٱلْهِيمِ
پھر پینے والے بھی پیاسے اونٹوں کی طرح.[1]
[1] هِيمٌ ، أَهْيَمُ کی جمع ہے، ان پیاسے اونٹوں کو کہا جاتا ہے جو ایک خاص بیماری کی وجہ سے پانی پر پانی پیئے جاتے ہیں لیکن ان کی پیاس نہیں بجھتی۔ مطلب یہ ہے کہ زقوم کھانے کے بعد بھی اس طرح نہیں پیو گے جس طرح عام معمول ہوتا ہے، بلکہ ایک تو بطور عذاب کے تمہیں پینے کےلیے کھولتاہوا پانی ملے گا۔ دوسرا تم اسے پیاسے اونٹوں کی طرح پیئے جاؤ گے لیکن تمہاری پیاس دور نہیں ہوگی۔
سورۃ Al-Waqi'ah [56]: 55 · ترجمہ: محمد جوناگڑھی (QuranEnc v1.1.3)
هَٰذَا نُزُلُهُمْ يَوْمَ ٱلدِّينِ
قیامت کے دن ان کی مہمانی یہ ہے.[1]
[1] یہ بطور استہزا اور تہکم کے فرمایا، ورنہ مہمانی تو وہ ہوتی ہے جو مہمان کی عزت کے لیےتیار کی جاتی ہے۔ یہ ایسے ہی ہےجیسے بعض مقام پر فرمایا: «فَبَشِّرْهُمْ بِعَذَابٍ أَلِيمٍ» (آل عمران: 21) ”ان کو دردناک عذاب کی خوش خبری سنا دیجیئے“۔
سورۃ Al-Waqi'ah [56]: 56 · ترجمہ: محمد جوناگڑھی (QuranEnc v1.1.3)
نَحْنُ خَلَقْنَٰكُمْ فَلَوْلَا تُصَدِّقُونَ
ہم ہی نے تم سب کو پیدا کیا ہے پھر تم کیوں باور نہیں کرتے؟[1]
[1] یعنی تم جانتے ہو کہ تمہیں پیدا کرنے والا اللہ ہی ہے، پھر تم اس کو مانتے کیوں نہیں ہو؟ یا دوبارہ زندہ کرنے پر یقین کیوں نہیں کرتے؟
سورۃ Al-Waqi'ah [56]: 57 · ترجمہ: محمد جوناگڑھی (QuranEnc v1.1.3)
أَفَرَءَيْتُم مَّا تُمْنُونَ
اچھا پھر یہ تو بتلاؤ کہ جو منی تم ٹپکاتے ہو.
سورۃ Al-Waqi'ah [56]: 58 · ترجمہ: محمد جوناگڑھی (QuranEnc v1.1.3)
ءَأَنتُمْ تَخْلُقُونَهُۥٓ أَمْ نَحْنُ ٱلْخَٰلِقُونَ
کیا اس کا (انسان) تم بناتے ہو یا پیدا کرنے والے ہم ہی ہیں؟[1]
[1] یعنی تمہارے بیویوں سےمباشرت کرنے کے نتیجے میں تمہارے جو قطرات منی عورتوں کے رحموں میں جاتے ہیں، ان سے انسانی شکل وصورت بنانے والے ہم ہیں یا تم؟
سورۃ Al-Waqi'ah [56]: 59 · ترجمہ: محمد جوناگڑھی (QuranEnc v1.1.3)
نَحْنُ قَدَّرْنَا بَيْنَكُمُ ٱلْمَوْتَ وَمَا نَحْنُ بِمَسْبُوقِينَ
ہم ہی نے تم میں موت کو متعین کر دیا[1] ہے اور ہم اس سے ہارے ہوئے نہیں ہیں.[2]
[1] یعنی ہر شخص کی موت کا وقت مقرر کر دیا ہے، جس سے کوئی تجاوز نہیں کر سکتا۔ چنانچہ کوئی بچپن میں، کوئی جوانی میں اور کوئی بڑھاپے میں فوت ہوتا ہے۔ [2] یا مغلوب اور عاجز نہیں ہیں، بلکہ قادر ہیں۔
سورۃ Al-Waqi'ah [56]: 60 · ترجمہ: محمد جوناگڑھی (QuranEnc v1.1.3)
عَلَىٰٓ أَن نُّبَدِّلَ أَمْثَٰلَكُمْ وَنُنشِئَكُمْ فِى مَا لَا تَعْلَمُونَ
کہ تمہاری جگہ تم جیسے اور پیدا کر دیں اور تمہیں نئے سرے سے اس عالم میں پیدا کریں جس سے تم (بالکل) بےخبر ہو.[1]
[1] یعنی تمہاری صورتیں مسخ کر کے تمہیں بندر اور خنزیر بنادیں اور تمہاری جگہ تمہاری شکل و صورت کی کوئی اور مخلوق پیداکردیں۔
سورۃ Al-Waqi'ah [56]: 61 · ترجمہ: محمد جوناگڑھی (QuranEnc v1.1.3)
وَلَقَدْ عَلِمْتُمُ ٱلنَّشْأَةَ ٱلْأُولَىٰ فَلَوْلَا تَذَكَّرُونَ
تمہیں یقینی طور پر پہلی دفعہ کی پیدائش معلوم ہی ہے پھر کیوں عبرت حاصل نہیں کرتے؟[1]
[1] یعنی کیوں یہ نہیں سمجھتے کہ جس طرح اس نے تمہیں پہلی مرتبہ پیدا کیا (جس کا تمہیں علم ہے) وہ دوبارہ بھی پیدا کر سکتا ہے۔
سورۃ Al-Waqi'ah [56]: 62 · ترجمہ: محمد جوناگڑھی (QuranEnc v1.1.3)
أَفَرَءَيْتُم مَّا تَحْرُثُونَ
اچھا پھر یہ بھی بتلاؤ کہ تم جو کچھ بوتے ہو.
سورۃ Al-Waqi'ah [56]: 63 · ترجمہ: محمد جوناگڑھی (QuranEnc v1.1.3)
ءَأَنتُمْ تَزْرَعُونَهُۥٓ أَمْ نَحْنُ ٱلزَّٰرِعُونَ
اسے تم ہی اگاتے ہو یا ہم اگانے والے ہیں.[1]
[1] یعنی زمین میں تم جو بیج بوتے ہو، اس سے ایک درخت زمین کے اوپر نمودار ہو جاتا ہے۔ غلے کے ایک بےجان دانے کوپھاڑ کر اور زمین کے سینے کو چیر کو اس طرح درخت اگانے والا کون ہے؟ یہ بھی منی کے قطرے سے انسان بنا دینے کی طرح ہماری ہی قدرت کا شاہکار ہے۔ یا تمہارے کسی ہنر یا چھو منتر کانتیجہ ہے؟
سورۃ Al-Waqi'ah [56]: 64 · ترجمہ: محمد جوناگڑھی (QuranEnc v1.1.3)
لَوْ نَشَآءُ لَجَعَلْنَٰهُ حُطَٰمًا فَظَلْتُمْ تَفَكَّهُونَ
اگر ہم چاہیں تواسے ریزه ریزه کر ڈالیں اور تم حیرت کے ساتھ باتیں بناتے ہی ره جاؤ.[1]
[1] یعنی کھیتی کو سرسبز وشاداب کرنےکے بعد، جب وہ پکنے کے قریب ہو جائے توہم اگر چاہیں تو اسے خشک کر کے ریزہ ریزہ کردیں اور تم حیرت سے منہ ہی تکتے رہ جاؤ۔ تَفَكُّهٌ اضداد میں سے ہے اس کے معنی نعمت وخوش حالی بھی ہیں اور حزن ویاس بھی۔ یہاں دوسرے معنی مراد ہیں، اس کے مختلف معانی کیے گئے ہیں، تُنَوِّعُونَ كَلامَكُمْ ، تَنْدَمُونَ ، تَحْزَنُونَ ، تَعْجَبُونَ ، تَلاوَمُونَ، اور تَفْجَعُونَ وغیرہ۔ ظَلْتُمْ، اصل میں ظَلَلْتُم بمعنی صِرْتُمْ اور تَفَكَّهُونَ، تَتَفَكَّهُونَ ہے۔
سورۃ Al-Waqi'ah [56]: 65 · ترجمہ: محمد جوناگڑھی (QuranEnc v1.1.3)
إِنَّا لَمُغْرَمُونَ
کہ ہم پر تو تاوان ہی پڑ گیا.[1]
[1] یعنی ہم نے پہلے زمین پر ہل چلا کر اسے ٹھیک کیا پھر بیج ڈالا، پھر اسے پانی دیتے رہے، لیکن جب فصل کے پکنے کا وقت آیا تو وہ خشک ہو گئی، اور ہمیں کچھ بھی نہ ملا یعنی یہ سارا خرچ اور محنت، ایک تاوان ہی ہوا جو ہمیں برداشت کرنا پڑا۔ تاوان کا مطلب یہی ہوتا ہے کہ انسان کو اس کے مال یا محنت کامعاوضہ نہ ملے، بلکہ وہ یوں ہی ضائع ہو جائے یا زبردستی اس سے کچھ موصول کر لیا جائے۔ اور اس کےبدلے میں اسے کچھ نہ دیا جائے۔
سورۃ Al-Waqi'ah [56]: 66 · ترجمہ: محمد جوناگڑھی (QuranEnc v1.1.3)
بَلْ نَحْنُ مَحْرُومُونَ
بلکہ ہم بالکل محروم ہی ره گئے.
سورۃ Al-Waqi'ah [56]: 67 · ترجمہ: محمد جوناگڑھی (QuranEnc v1.1.3)
أَفَرَءَيْتُمُ ٱلْمَآءَ ٱلَّذِى تَشْرَبُونَ
اچھا یہ بتاؤ کہ جس پانی کو تم پیتے ہو.
سورۃ Al-Waqi'ah [56]: 68 · ترجمہ: محمد جوناگڑھی (QuranEnc v1.1.3)
ءَأَنتُمْ أَنزَلْتُمُوهُ مِنَ ٱلْمُزْنِ أَمْ نَحْنُ ٱلْمُنزِلُونَ
اسے بادلوں سے بھی تم ہی اتارتے ہو یا ہم برساتے ہیں؟
سورۃ Al-Waqi'ah [56]: 69 · ترجمہ: محمد جوناگڑھی (QuranEnc v1.1.3)
لَوْ نَشَآءُ جَعَلْنَٰهُ أُجَاجًا فَلَوْلَا تَشْكُرُونَ
اگر ہماری منشا ہو تو ہم اسے کڑوا زہر کردیں پھر تم ہماری شکرگزاری کیوں نہیں کرتے؟[1]
[1] یعنی اس احسان پر ہماری اطاعت کر کے ہمارا عملی شکر اداکیوں نہیں کرتے؟
سورۃ Al-Waqi'ah [56]: 70 · ترجمہ: محمد جوناگڑھی (QuranEnc v1.1.3)
أَفَرَءَيْتُمُ ٱلنَّارَ ٱلَّتِى تُورُونَ
اچھا ذرا یہ بھی بتاؤ کہ جو آگ تم سلگاتے ہو.
سورۃ Al-Waqi'ah [56]: 71 · ترجمہ: محمد جوناگڑھی (QuranEnc v1.1.3)
ءَأَنتُمْ أَنشَأْتُمْ شَجَرَتَهَآ أَمْ نَحْنُ ٱلْمُنشِـُٔونَ
اس کے درخت کو تم نے پیدا کیا ہے یا ہم اس کے پیدا کرنے والے ہیں؟[1]
[1] کہتے ہیں عرب میں دو درخت ہیں، مرخ اور عفار، ان دونوں سے ٹہنیاں لے کر، ان کو آپس میں رگڑا جائے تو اس سےآگ کے شرارے نکلتے ہیں۔
سورۃ Al-Waqi'ah [56]: 72 · ترجمہ: محمد جوناگڑھی (QuranEnc v1.1.3)
نَحْنُ جَعَلْنَٰهَا تَذْكِرَةً وَمَتَٰعًا لِّلْمُقْوِينَ
ہم نے اسے سبب نصیحت[1] اور مسافروں کے فائدے کی چیز بنایا ہے.[2]
[1] کہ اس کے اثرات اور فوائد حیرت انگیز ہیں اور دنیاکی بےشمار چیزوں کی تیاری کے لیے اسے ریڑھ کی ہڈی کی حیثیت حاصل ہے۔ جو ہماری قدرت عظیمہ کی نشانی ہے، پھر ہم نے جس طرح دنیامیں یہ آگ پیدا کی ہے، ہم آخرت میں بھی پیدا کرنے پر قادر ہیں۔ جو اس سے 69 درجہ حرارت میں زیادہ ہو گی۔ (كَمَا فِي الْحَدِيثِ)۔ [2] مُقْوِينَ، مُقْوٍ کی جمع ہے، قَوَاءٌ یعنی خالی صحرا میں داخل ہونے والا، مراد مسافر ہے۔ یعنی مسافر صحراؤں اور جنگلوں میں ان درختوں سے فائدہ اٹھاتے ہیں، اس سے روشنی، گرمی اور ایندھن حاصل کرتے ہیں۔ بعض نے مُقْوٍ سے وہ فقرا مراد لیےہیں جو بھوک کی وجہ سے خالی پیٹ ہوں۔ بعض نے اس کی معنی مُسْتَمْتِعِينَ (فائدہ اٹھانے والے) کیے ہیں۔ اس میں امیر ، غریب، مقیم اور مسافر سب آ جاتے ہیں اور سب ہی آگ سے فائدہ اٹھاتے ہیں، اسی لیے حدیث میں جن تین چیزوں کو عام رکھنے کا اوران سے کسی کو نہ روکنے کا حکم دیا گیا ہے، ان میں پانی اورگھاس کے علاوہ آگ بھی ہے، (أبو داود، كتاب البيوع، باب في منع الماء ، وسنن ابن ماجه، كتاب الرهون، باب المسلمون شركاء في ثلاث) امام ابن کثیر نے اس مفہوم کو زیادہ پسندکیا ہے۔
سورۃ Al-Waqi'ah [56]: 73 · ترجمہ: محمد جوناگڑھی (QuranEnc v1.1.3)
فَسَبِّحْ بِٱسْمِ رَبِّكَ ٱلْعَظِيمِ
پس اپنے بہت بڑے رب کے نام کی تسبیح کیا کرو.
سورۃ Al-Waqi'ah [56]: 74 · ترجمہ: محمد جوناگڑھی (QuranEnc v1.1.3)
فَلَآ أُقْسِمُ بِمَوَٰقِعِ ٱلنُّجُومِ
پس میں قسم کھاتا ہوں ستاروں کے گرنے کی.[1]
[1] فَلا أُقْسِمُ میں ”لا“ زائد ہے جو تاکید کے لیے ہے۔ یا یہ زائد نہیں ہے۔ بلکہ ماقبل کی کسی چیز کی نفی کےلیے ہے۔ یعنی یہ قرآن کہانت یا شاعری نہیں ہے بلکہ میں ستاروں کے گرنے کی قسم کھا کر کہتا ہوں کہ یہ قرآن عزت والا ہے . . . مَوَاقِعُ النُّجُومِ سے مراد ستاروں کے طلوع و غروب کی جگہیں اور ان کی منزلیں اور مدارہیں، بعض نے ترجمہ کیا ہے ”قسم کھاتا ہوں آیتوں کے اترنے کی پیغمبروں کے دلوں میں“ (موضح القرآن) یعنی نجوم، قرآن کی آیات اور مواقع، قلوب انبیا۔ بعض نے اس کا مطلب قرآن کا آہستہ آہستہ بتدریج اترنا اور بعض نے قیامت والے ستاروں کا جھڑنا مراد لیا ہے۔ (ابن کثیر)۔
سورۃ Al-Waqi'ah [56]: 75 · ترجمہ: محمد جوناگڑھی (QuranEnc v1.1.3)
وَإِنَّهُۥ لَقَسَمٌ لَّوْ تَعْلَمُونَ عَظِيمٌ
اور اگرتمہیں علم ہو تو یہ بہت بڑی قسم ہے.
سورۃ Al-Waqi'ah [56]: 76 · ترجمہ: محمد جوناگڑھی (QuranEnc v1.1.3)
إِنَّهُۥ لَقُرْءَانٌ كَرِيمٌ
کہ بیشک یہ قرآن بہت بڑی عزت واﻻ ہے.[1]
[1] یہ جواب قسم ہے۔
سورۃ Al-Waqi'ah [56]: 77 · ترجمہ: محمد جوناگڑھی (QuranEnc v1.1.3)
فِى كِتَٰبٍ مَّكْنُونٍ
جو ایک محفوظ کتاب میں درج ہے[1]
[1] یعنی لوح محفوظ ہیں۔
سورۃ Al-Waqi'ah [56]: 78 · ترجمہ: محمد جوناگڑھی (QuranEnc v1.1.3)
لَّا يَمَسُّهُۥٓ إِلَّا ٱلْمُطَهَّرُونَ
جسے صرف پاک لوگ ہی چھو سکتے ہیں.[1]
[1] لا يَمَسُّهُ، میں ضمیر کا مرجع لوح محفوط ہے اور پاک لوگوں سے مراد فرشتے، بعض نے اس کا مرجع، قرآن کریم کو بنایا ہے یعنی اس قرآن کو فرشتے ہی چھوتےہیں، یعنی آسمانوں پر فرشتوں کے علاوہ کسی کی بھی رسائی اس قرآن تک نہیں ہوتی۔ مطلب مشرکین کی تردید ہے جو کہتے تھے کہ قرآن شیاطین لے کر اترتے ہیں۔ اللہ نے فرمایا یہ کیونکر ممکن ہے یہ قرآن تو شیطانی اثرات سے بالکل محفوظ ہے۔
سورۃ Al-Waqi'ah [56]: 79 · ترجمہ: محمد جوناگڑھی (QuranEnc v1.1.3)
تَنزِيلٌ مِّن رَّبِّ ٱلْعَٰلَمِينَ
یہ رب العالمین کی طرف سےاترا ہوا ہے.
سورۃ Al-Waqi'ah [56]: 80 · ترجمہ: محمد جوناگڑھی (QuranEnc v1.1.3)
أَفَبِهَٰذَا ٱلْحَدِيثِ أَنتُم مُّدْهِنُونَ
پس کیا تم ایسی بات کو سرسری (اور معمولی) سمجھ رہے ہو؟[1]
[1] حدیث سے مراد قرآن کریم ہے مُدَاهَنَةٌ، وہ نرمی جو کفر ونفاق کے مقابلے میں اختیار کی جائے۔ دراں حالیکہ ان کے مقابلے میں سخت تر رویے کی ضرورت ہے۔ یعنی اس قرآن کو اپنانے کے معاملےمیں تمام کافروں کو خوش کرنے کے لیے نرمی اور اعراض کا راستہ اختیار کر رہے ہو۔ حالانکہ یہ قرآن جو مذکورہ صفات کا حامل ہے، اس لائق ہے کہ اسے نہایت خوشی سے اپنایا جائے۔
سورۃ Al-Waqi'ah [56]: 81 · ترجمہ: محمد جوناگڑھی (QuranEnc v1.1.3)
وَتَجْعَلُونَ رِزْقَكُمْ أَنَّكُمْ تُكَذِّبُونَ
اور اپنے حصے میں یہی لیتے ہو کہ جھٹلاتے پھرو.
سورۃ Al-Waqi'ah [56]: 82 · ترجمہ: محمد جوناگڑھی (QuranEnc v1.1.3)
فَلَوْلَآ إِذَا بَلَغَتِ ٱلْحُلْقُومَ
پس جبکہ روح نرخرے تک پہنچ جائے.
سورۃ Al-Waqi'ah [56]: 83 · ترجمہ: محمد جوناگڑھی (QuranEnc v1.1.3)
وَأَنتُمْ حِينَئِذٍ تَنظُرُونَ
اور تم اس وقت آنکھوں سے دیکھتے رہو.[1]
[1] یعنی روح نکلتے ہوئے دیکھتے ہو لیکن اسے ٹال سکنے کی یا اسے کوئی فائدہ پہنچانےکی قدرت نہیں رکھتے۔
سورۃ Al-Waqi'ah [56]: 84 · ترجمہ: محمد جوناگڑھی (QuranEnc v1.1.3)
وَنَحْنُ أَقْرَبُ إِلَيْهِ مِنكُمْ وَلَٰكِن لَّا تُبْصِرُونَ
ہم اس شخص سے بہ نسبت تمہارے بہت زیاده قریب ہوتے ہیں[1] لیکن تم نہیں دیکھ سکتے.[2]
[1] یعنی مرنے والے کے ہم، تم سے بھی زیادہ قریب ہوتےہیں۔ اپنے علم، قدرت اور رؤیت کے اعتبار سے۔ یا ہم سے مراد اللہ کے کارندے یعنی موت کے فرشتے ہیں جو اس کی روح قبض کرتےہیں۔ [2] یعنی اپنی جہالت کی وجہ سے تمہیں اس بات کا ادراک نہیں کہ اللہ تو تمہاری شہ رگ سے بھی زیادہ قریب ہے یا روح قبض کرنے والے فرشتوں کو تم دیکھ نہیں سکتے۔
سورۃ Al-Waqi'ah [56]: 85 · ترجمہ: محمد جوناگڑھی (QuranEnc v1.1.3)
فَلَوْلَآ إِن كُنتُمْ غَيْرَ مَدِينِينَ
پس اگر تم کسی کے زیرفرمان نہیں.
سورۃ Al-Waqi'ah [56]: 86 · ترجمہ: محمد جوناگڑھی (QuranEnc v1.1.3)
تَرْجِعُونَهَآ إِن كُنتُمْ صَٰدِقِينَ
اور اس قول میں سچے ہو تو (ذرا) اس روح کو تو لوٹاؤ.[1]
[1] دَانَ يَدِينُ کے معنی ہیں، ماتحت ہونا، دوسرے معنی ہیں بدلہ دینا۔ یعنی اگر تم اس بات میں سچے ہو کہ کوئی تمہارا آقا اور مالک نہیں جس کے تم زیرفرمان اور ماتحت ہو یاکوئی جزا سزا کا دن نہیں آئے گا، تو اس قبض کی ہوئی روح کو اپنی جگہ پر واپس لوٹا کر دکھاو اور اگرتم ایسا نہیں کر سکتے تو اس کا صاف مطلب یہ ہے کہ تمہارا گمان باطل ہے۔ یقیناً تمہارا ایک آقا ہے اور یقیناً ایک دن آئے گا جس میں وہ آقا ہر ایک کو اس کے عمل کی جزادے گا۔
سورۃ Al-Waqi'ah [56]: 87 · ترجمہ: محمد جوناگڑھی (QuranEnc v1.1.3)
فَأَمَّآ إِن كَانَ مِنَ ٱلْمُقَرَّبِينَ
پس جو کوئی بارگاه الٰہی سے قریب کیا ہوا ہوگا.[1]
[1] سورت کے آغاز میں اعمال کےلحاظ سے انسانوں کی جو تین قسمیں بیان کی گئیں تھیں، ان کا پھر ذکر کیا جا رہا ہے۔ یہ ان کی پہلی قسم ہے جنہیں مقربین کے علاوہ سابقین بھی کہا جاتا ہے۔ کیونکہ وہ نیکی کے ہرکام میں آگے آگے ہوتے ہیں اور قبول ایمان میں بھی دوسروں سے سبقت کرتے ہیں اور اپنی اسی خوبی کی وجہ سے وہ مقربین بارگاہ الٰہی قرار پاتے ہیں۔
سورۃ Al-Waqi'ah [56]: 88 · ترجمہ: محمد جوناگڑھی (QuranEnc v1.1.3)
فَرَوْحٌ وَرَيْحَانٌ وَجَنَّتُ نَعِيمٍ
اسے تو راحت ہے اور غذائیں ہیں اور آرام والی جنت ہے.
سورۃ Al-Waqi'ah [56]: 89 · ترجمہ: محمد جوناگڑھی (QuranEnc v1.1.3)
وَأَمَّآ إِن كَانَ مِنْ أَصْحَٰبِ ٱلْيَمِينِ
اور جو شحص داہنے (ہاتھ) والوں میں سے ہے.[1]
[1] یہ دوسری قسم ہے، عام مومنین۔ یہ بھی جہنم سے بچ کر جنت میں جائیں گے، تاہم درجات میں سابقین سے کم تر ہوں گے۔ موت کے وقت فرشتے ان کو بھی سلامتی کی خوش خبری دیتے ہیں۔
سورۃ Al-Waqi'ah [56]: 90 · ترجمہ: محمد جوناگڑھی (QuranEnc v1.1.3)
فَسَلَٰمٌ لَّكَ مِنْ أَصْحَٰبِ ٱلْيَمِينِ
تو بھی سلامتی ہے تیرے لیے کہ تو داہنے والوں میں سے ہے.
سورۃ Al-Waqi'ah [56]: 91 · ترجمہ: محمد جوناگڑھی (QuranEnc v1.1.3)
وَأَمَّآ إِن كَانَ مِنَ ٱلْمُكَذِّبِينَ ٱلضَّآلِّينَ
لیکن اگر کوئی جھٹلانے والوں گمراہوں میں سے ہے.[1]
[1] یہ تیسری قسم ہے جنہیں آغازسورت میں أَصْحَابُ الْمَشْئَمَة ِکہا گیا تھا، بائیں ہاتھ والے یا حاملین نحوست۔ یہ اپنے کفر ونفاق کی سزا یا اس کی نحوست عذاب جہنم کی صورت میں بھگتیں گے۔
سورۃ Al-Waqi'ah [56]: 92 · ترجمہ: محمد جوناگڑھی (QuranEnc v1.1.3)
فَنُزُلٌ مِّنْ حَمِيمٍ
تو کھولتے ہوئے گرم پانی کی مہمانی ہے.
سورۃ Al-Waqi'ah [56]: 93 · ترجمہ: محمد جوناگڑھی (QuranEnc v1.1.3)
وَتَصْلِيَةُ جَحِيمٍ
اور دوزخ میں جانا ہے.
سورۃ Al-Waqi'ah [56]: 94 · ترجمہ: محمد جوناگڑھی (QuranEnc v1.1.3)
إِنَّ هَٰذَا لَهُوَ حَقُّ ٱلْيَقِينِ
یہ خبر سراسر حق اور قطعاً یقینی ہے.
سورۃ Al-Waqi'ah [56]: 95 · ترجمہ: محمد جوناگڑھی (QuranEnc v1.1.3)
فَسَبِّحْ بِٱسْمِ رَبِّكَ ٱلْعَظِيمِ
پس تواپنے عظیم الشان پروردگار کی تسبیح کر.[1]
[1] حدیث میں آتا ہے کہ دو کلمے اللہ کو بہت محبوب ہیں، زباں پر ہلکے اور وزن میں بھاری۔ سُبْحَانَ اللهِ وَبِحَمْدِه سَبْحَانَ اللهِ الْعَظِيمِ (صحيح بخاري آخری حدیث وصحيح مسلم كتاب الذكر ، باب فضل التهليل والتسبيح والدعاء)۔
سورۃ Al-Waqi'ah [56]: 96 · ترجمہ: محمد جوناگڑھی (QuranEnc v1.1.3)
96 آیات۔ الواقعة قرآن کی 56ویں سورۃ ہے اور مکی ہے۔
پارہ 27۔ اس کی پہلی آیت مصحفِ مدینہ کے صفحہ 534 پر ہے۔
الواقعة کا مطلب “واقعہ ہونے والی قیامت” ہے۔
عربی متن تنزیل (رسمِ عثمانی، ورژن 1.1) سے اور ترجمہ ترجمہ: محمد جوناگڑھی (QuranEnc v1.1.3) سے۔ دونوں بغیر کسی تبدیلی کے دکھائے گئے ہیں۔
عربی متن · Tanzil Project (tanzil.net)، رسمِ عثمانی ورژن 1.1، CC BY 3.0، بغیر تبدیلی کے نقل
ترجمہ · Urdu Translation - Muhammad Junagarhi · QuranEnc.com v1.1.3
پارے اور صفحات · Tanzil Quran Metadata 1.0 (مصحفِ مدینہ، 604 صفحات)، CC BY 3.0